રાજસ્થાન એટલે રણ, રસોઇ, અને રહસ્યોનું સ્થળ, આજે એવા જ એક રહસ્યમય જગ્યાની વાત કરીશું જે વર્ષોથી ઉજ્જડ છે અને આ જગ્યાએ રાત્રે લોકો જતા ડરે છે શું છે રહસ્યમય કારણ? જાણી જ લો આજે.
રાજસ્થાનના જેસલમેરથી 18 કિલોમીટર દૂર આવેલું છે કુલધરા નામનું આ ગામ કે જે ઘણાં વર્ષોથી ઉજ્જડ છે. આ ગામમાં લોકો રાતોરાત ગાયબ થઈ ગયા હતા. લગભગ 200 વર્ષ પહેલા આ ગામની આસપાસ પાલીવાલ બ્રાહ્મણ રહેતા હતા. પણ, અહીં હવે કોઈ રહેતું નથી અને માત્ર ખાલી મકાનો છે.
એવું કહેવાય છે કે અહીંના એક દીવાન સાલેમ સિંહની ખરાબ નજર ગામના મંદિરના પૂજારીની પુત્રી પર પડી હતી. તે જિદ્દી હતો અને આ પૂજારીની પુત્રી સાથે લગ્ન કરવા માટે તેણે ગામના લોકોને કેટલાંક દિવસનો સમય આપ્યો. હવે, આ ગામના લોકો માટે ગામની છોકરી અને ગામના આત્મસન્માન માટેની લડાઈ હતી.
સાલેમ સિંહની ધમકી બાદ પાલીવાલ બ્રાહ્મણોના અનેક પરિવારે આ જગ્યા છોડવાનો નિર્ણય લીધો. તેઓ રાતોરાત ગામ ખાલી કરીને જતા રહ્યા અને તેઓ ક્યાં ગયા આજસુધી કોઈને ખબર નથી. એવું કહેવાય છે કે પાલીવાલ બ્રાહ્મણોએ ગામ છોડતા પહેલા એવો શ્રાપ આપ્યો કે આ ગામ ક્યારેય આબાદ નહીં થાય.
ત્યારબાદ ઘણાં લોકોએ અહીં વસવાટ કરવાનો પ્રયાસ કર્યો પણ તેઓ નિષ્ફળ રહ્યા. આ સિવાય આ ગામ ખાલી થવા પાછળની અન્ય પ્રચલિત કહાની કંઈક એવી છે કે અહીં બ્રાહ્મણો પર એટલો કર લાદવામાં આવ્યો હતો કે તેમના માટે વેપાર કરવાનું મુશ્કેલ થઈ ગયું હતું, માટે તેમણે આ ગામ ખાલી કર્યું હતું.
એવું પણ કહેવાય છે કે આ ગામમાં અલૌકિક શક્તિઓનો વાસ છે અને જે કોઈ અહીં આવે તેમને આ પ્રકારની શક્તિઓનો અહીં આભાસ થાય છે. લોકો અહીં રાત્રે નહીં પરંતુ દિવસે પણ આવતા ડરે છે. અહીં ખજાનો દટાયેલો હોવાની પણ એક પ્રચલિત કહાની છે.
