આ દેશનો સૌથી ધનવાન વ્યક્તિ કોઈ છોકરીને પુત્રવધુ બનાવવા ફોન કરે અને તે મજાક સમજીને ફોન કાપી નાખે તો? કેવું લાગે? જી હા આવું આપણા દેશના ધનકુબેર મુકેશ અંબાણીના પિતા ધીરુભાઈ અંબાણી જોડે થઈ ચૂક્યું છે જાણો તમે.
દેશના સૌથી અમીર અંબાણી પરિવાર વિષે જાણવામાં હંમેશા લોકોને રસ રહે છે. આ પરિવારમાં જ્યારે પણ કોઈ કાર્યક્રમ થાય છે, બધાની નજર તેમના પર ચોંટી જાય છે. દેશના સૌથી સંપન્ન પરિવારનું ઘડતર કરનારા ધીરુભાઈ અંબાણીની વાત છે.
6 જુલાઈ 2002 ના રોજ ધીરુભાઈ અંબાણીએ છેલ્લા શ્વાસ લીધા હતા. તમને જાણીને નવાઈ લાગશે કે એક સમય એવો પણ આવ્યો હતો જ્યારે તેમની મોટી વહુ નીતા અંબાણીએ સસરા ધીરુભાઈને ઓળખવાનો ઈનકાર કરી દીધો હતો.
મુકેશ અને નીતા અંબાણીના લગ્ન 1985 માં થયા હતા. તેની પહેલા એક વર્ષ સુધી બંનેએ એકબીજાને ઓળખવામાં ગાળ્યા હતા. મુકેશ અંબાણી પહેલા તેમના પિતા ધીરુભાઈએ નીતાને પસંદ કર્યા હતા. નીતા એક ભરતનાટ્યમ ડાન્સર હતા.
ધીરુભાઈ અંબાણીએ નીતાને એક ફંક્શનમાં ડાન્સ કરતા જોઈને પોતાના દીકરા માટે પસંદ કરી લીધી હતી. નીતા અંબાણીએ પોતે એક ઈન્ટરવ્યુમાં આ વાતનો ખુલાસો કર્યો હતો. નીતા અંબાણીએ ઈન્ટરવ્યુમાં જણાવ્યું હતું, “ગુજરાતી કોમ્યુનિટી તરફથી નવરાત્રિએ એક એન્યુઅલ ફંક્શન હતુ. મેં એ ફંક્શનમાં પરફોર કર્યું હતું. મને બિલકુલ અંદાજ નહતો કે મને કોઈ નોટિસ કરી રહ્યું છે.
ફંક્શનના થોડા દિવસ બાદ મને ઘરે ફોન આવ્યો. સામેથી કહ્યું, હું ધીરુભાઈ અંબાણી બોલી રહ્યો છું. મને લાગ્યું કોઈ મજાક કરે છે. મેં તરત જ ફોન કાપી નાંખ્યો. થોડી વાર પછી ફરી ફોન આવ્યો. સામેથી બોલ્યા કે હું ધીરુભાઈ અંબાણી બોલી રહ્યો છુ. મેં કહ્યું- તો હું એલિઝાબેથ ટેલર છું, અને મેં ફોન કાપી નાંખ્યો. તેમણે ત્રીજી વાર પણ ફોન કર્યો. આ વખતે મારા પિતાએ ફોન ઉપાડ્યો. અચાનક તેમના હાવભાવ બદલાઈ ગયા. તેમણે મને કહ્યું કે ફોન પર ધીરુભાઈ અંબાણી છે અને તેમની સાથે વ્યવસ્થિત રીતે વાત કર.”
નીતા અંબાણીએ જૂની યાદો વાગોળતા કહ્યું, “તેમણે મને ઑફિસ મળવા બોલાવી. હું ખૂબ નર્વસ હતી. હું તેમને મળી અને ખૂબ ઈમ્પ્રેસ થઈ ગઈ. મને તે ખૂબ સરળ સ્વભાવના લાગ્યા. તેમણે મને ઘરે ડિનર માટે બોલાવી.” નીતા જ્યારે ધીરુભાઈના ઘરે પહોંચ્યા તો ધીરુભાઈએ દીકરા મુકેશને કહ્યું કે તેમણે તેના માટે છોકરી પસંદ કરી છેઅને એટલે તેણે જ દરવાજો ખોલવા જવાનું છે.
મુકેશ અંબાણીએ જ્યારે નીતાને જોઈ તો તરત જ તેમનું દિલ તેમના પર આવી ગયું. બંનેએ એક બીજાને ઓળખવાનું શરૂ કર્યું. નીતા અને મુકેશ મર્સિડિઝ કાર છોડીને ડબલ ડેકર બસમાં ટ્રાવેલ કરતા હતા.
એ વાત જગજાહેર છે કે નીતા અંબાણીને પ્રપોઝ કરવા માટે મુકેશ અંબાણીએ મુંબઈના સૌથી બિઝી રસ્તે કાર રોકી દીધી હતી. પાછળથી ગાડીઓ હોર્ન પર હોર્ન વગાડતી હતી. નીતાએ જ્યારે થોડી વાર રહીને હામાં જવાબ આપ્યો ત્યારે કાર આગળ વધારી હતી. આમ ધીરુભાઈએ પસંદ કરેલી છોકરી સાથે પ્રેમમાં પડેલા મુકેશ અંબાણીએ નીતા સાથે લગ્ન કર્યા હતા.
